ქართველი კლასიკოსი დრამატურგის პოლიკარპე კაკაბაძის ექსპერიმენტული პიესა, სიმბოლისტურ-ექსპრესიული დრამა “სამი ასული” – რეჟისორი სალომე ჯიჯავაძის ინტერპრეტქციით წარმოგვიდგება ალტერნატიული, დოკუმენტურ-მხატვრული სახით. ძირითადი ხაზი ფემიციდსა და ქალთა უფლებების შელახვაზე არის აქცენტირებული: რა რეალობაში უწევს არსებობა ქალს? მდგომარეობა, რომელსაც განიცდის სოციუმის დამოკიდებულების, სუბიექტური შეხედულებებისა თუ პიროვნული კომფორტის ზონის ჩარჩოების რღვევის შიშის გამო. ქალთა მიმართ ძალადობა – ძალადობრივი ქმედებების ფართო სპექტრს მოიცავს, დაწყებული სიტყვიერი შეურაცხყოფითა და ემოციური ძალადობის სხვა ფორმებით, დამთავრებული ფიზიკური თუ სექსუალურით. სპექტაკლში რეტროსპექტივის გამოყენების საშუალებით თამანმედროვე რეალობაა წარმოდგენილი. ძირითადი პერსონაჟები – სამი ასული, სიმბოლურად მოწყვლადი ჯგუფის წარმომადგენლები არიან, რომელთა ქმედებებიც სიუჟეტურ ხაზს აგებს და ცდილობს სისტემის რღვევას.